རྒྱ་ནག་གཞུང་གི་གསང་བའི་ཚན་པས་སྤྱི་བདེ་ཉེན་རྟོག་པ་ཞིག་སོ་མྱུལ་དུ་བཏང་སྟེ་བཙན་བྱོལ་སྤྱི་ཚོགས་ནང་དྲག་སྤྱོད་ཀྱི་ལས་འགུལ་སྤེལ་རྒྱུའི་འཆར་གཞི་ཡོད་པ་ར་འཕྲོད་བྱུང་བའི་ཡོངས་ཁྱབ་གསལ་བསྒྲགས།

༄༅། །རྒྱ་ནག་གི་སྐབས་དགུ་པའི་རྒྱལ་ཡོངས་མི་དམངས་འཐུས་མི་ཚོགས་ཆེན་གྱི་བོད་རང་སྐྱོང་ལྗོངས་ཀྱི་འཐུས་མི་ཡིན་པ་དང་། ཆབ་མདོ་ས་ཁུལ་སྲིད་ཁྲིམས་ཐིང་གི་དྲུང་ཆེ། ཆབ་མདོ་ས་ཁུལ་སྤྱི་བདེ་ཁྲུའུ་ཡི་དྲུང་ཆེ་བཅས་ཡིན་པའི་ལིའི་གཡུས་ཆོན་ནས་འཆར་གཞི་དང་དམིགས་ཡུལ་ཡོད་པའི་ཐོག་ནས་རྒྱ་ནག་དམག་མི་ལས་བསྒྱུར་དང་སྤྱི་བདེའི་ཉེན་རྟོག་པ་ཡིན་པའི་མི་གཅིག་བཙན་བྱོལ་བོད་མིའི་སྤྱི་ཚོགས་ནང་སོ་མྱུལ་དུ་བཏང་སྟེ་༸གོང་ས་མཆོག་གི་སྐུ་ཕྱྭ་དང་འབྲེལ་བའི་གནས་ཚུལ་མཁོ་སྒྲུབ་བྱས་པར་མ་ཟད། བཙན་བྱོལ་སྒྲིག་འཛུགས་དང་གཞུང་འབྲེལ་མིན་པའི་ཚོགས་པ་ཁག་གི་གནས་ཚུལ་སོགས་ཀྱང་མཁོ་སྒྲུབ་བྱས་ཡོད་པ་རེད། རྒྱ་མིའི་སོ་མྱུལ་བ། སྤེན་པ་ཚེ་རིང།
ཕྱི་ལོ་ ༢༠༠༨ ལོར་བོད་ས་ཁྱོན་ཡོངས་སུ་ཞི་རྒོལ་བྱུང་རྗེས་རྒྱ་ནག་གཞུང་གིས་བཙན་བྱོལ་བོད་མིས་འཇིགས་བསྐུལ་དང་དྲག་སྤྱོད་ཀྱི་ལས་འགུལ་སྤེལ་གྱི་ཡོད་པའི་ཉེས་འཛུགས་བྱས་ཀྱང་དཔང་རྟགས་གང་ཡང་མེད་སྟབས་སོ་མྱུལ་དེར་བཙན་བྱོལ་སྤྱི་ཚོགས་ནས་དྲག་སྤྱོད་དང་འཇིགས་བསྐུལ་གྱི་ལས་འགུལ་སྤེལ་འཆར་ཡོད་མེད་རྟོགས་ཞིབ་བྱ་རྒྱུའི་མངགས་ཆ་བྱས་པ་དང་། སླར་ཡང་སྔ་ལོ་ཕྱི་ལོ་ ༢༠༡༢ ལོར་ལིའི་གཡུས་ཆོན་གྱིས་སོ་མྱུལ་པ་དེ་བལ་ཡུལ་དུ་ཐེངས་གཉིས་བསྟུད་མར་སྐད་བཏང་སྟེ་བོད་མི་གཉིས་དམར་གསོད་གཏོང་རྒྱུའི་ཆེད་དུག་རྫས་མི་འདྲ་བ་ཁག་གསུམ་བེད་སྤྱོད་བཏང་སྟེ་དམར་གསོད་དྲག་སྤྱོད་ཀྱི་ལས་འགུལ་སྤེལ་རྒྱུའི་ལས་འགན་སྤྲད་ཡོད་པ་དང་། བལ་ཡུལ་རང་དུ་དུག་གི་ནུས་པ་བརྟག་དཔྱད་སླད་བྱ་དེ་གཅིག་དང་ཁྱི་ཕྲུག་གཉིས་ལ་ཚོད་ལྟའང་བྱས་ཡོད། དེ་ལྟར་རྒྱ་ནག་གཞུང་གི་གསང་ལས་ཚན་པས་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཕྱྭ་མཛད་འཕྲིན་དང་འབྲེལ་བའི་གནས་ཚུལ་འཚོལ་སྒྲུབ་དང་། བཙན་བྱོལ་བོད་མི་ནང་ཁུལ་སྔར་བྱུང་མྱོང་མེད་པ་དམར་གསོད་ཀྱི་དོན་རྐྱེན་ཚབས་ཆེའི་དྲག་སྤྱོད་ལས་འགུལ་སྤེལ་ཆེད་མངགས་གཏོང་ལྟར་ཁོ་པའི་ངོས་ནས་ཀྱང་དེ་དོན་ལག་བསྟར་འབད་བརྩོན་བྱེད་པའི་སྐབས་སུ་བོད་འབྱོར་ཁམས་འབྲི་རུ་རྫོང་ཁོངས་ནས་ཡིན་པ་བཀྲིས་རྒྱལ་མཚན་༼མིང་གཞན་བཀྲིས་དོན་གྲུབ་༽དང་ཁམས་སྡེ་དགེ་དཔལ་སྤུངས་ཤང་ནས་ཡིན་པ་ཀརྨ་ཡེ་ཤེས་༼མིང་གཞན་བཀྲིས་༽གཉིས་ནས་ཁོ་པའི་གནས་ཚུལ་ཤེས་རྟོགས་བྱུང་སྟེ་ཉེས་ཅན་ལག་ཐོག་ནས་བཟུང་སྟེ་འདི་ག་བདེ་སྲུང་ལས་ཁུངས་སུ་ཐེར་འདོན་རྩིས་སྤྲོད་བྱས་བྱུང་བས་ཁོང་གཉིས་ཀྱི་སྙིང་སྟོབས་དང་ལྷག་བསམ་ལ་བསྔགས་བརྗོད་དང་ལེགས་སོ་ཞུ་རྒྱུ་ཡིན།

ཐེར་འདོན་བྱེད་མཁན། བཀྲིས་རྒྱལ་མཚན་ནམ་བཀྲིས་དོན་གྲུབ།འདི་ནས་འདྲི་ཞིབ་ནན་པོ་བྱས་རྗེས་ར་འཕྲོད་གསལ་པོ་བྱུང་བར་སོ་མྱུལ་བ་སྤེན་པ་ཚེ་རིང་ནི་ ༡༩༨༠ ལོར་ནག་ཆུ་ས་ཁུལ་ལྷ་རི་རྫོང་མཚོ་ར་ཤང་ཁོངས་སུ་སྐྱེས་པ་དང་། ས་གནས་སློབ་འབྲིང་དུ་བསྐྱོད་རྗེས་དམག་ནང་ཞུགས་པ་དང་། ཕྱི་ལོ་ ༢༠༠༢ ལོར་ནག་ཆུ་ས་ཁུལ་ལྷ་རི་རྫོང་ཁོངས་གྲོང་སྨད་ཤང་སྤྱི་བདེའི་ལས་བྱེད་ཡིན་མུས་ཐོག་སི་ཁྲོན་ཞིང་ཆེན་ལུའུ་ཀྲའུ་གྲོང་ཁྱེར་དུ་ལོ་གཉིས་རིང་སྤྱི་བདེའི་གསང་ལས་སློབ་སྦྱོང་ཐོན་རྗེས་འཇིགས་བསྐུལ་རྒོལ་རྡུང་རུ་ཁག་ཁོངས་སུ་འདེམས་སྒྲུག་བྱུང་འདུག དེ་རྗེས་སྐབས་དེའི་ནག་ཆུ་ས་གནས་སྤྱི་བདེ་ཁྲུའུ་ཡི་ཁྲུའུ་ཀྲང་ལིའི་གཡུས་ཆོན་གྱིས་ཁོ་པར་རྒྱ་གར་དུ་སོ་མྱུལ་ལ་འགྲོ་དགོས་ལས་འགན་སྤྲད་དེ་འགྲམ་འགག་སྒོ་བར་བསྐྱེལ། དེ་བཞིན་བརྒྱུད་ལམ་དང་དངོས་པོའི་དཔང་རྟགས། གྲོན་དངུལ་སྔ་རྗེས་ཧིན་སྒོར་འབུམ་བཅུ་གཅིག་ལྷག་སྤྲོད་ལེན་བྱས་གནས་བཅས་པ་དོ་བདག་རང་ངོས་ནས་ངོས་ལེན་གཙང་མ་བྱས་པའི་དོན་དངོས་ཀྱི་ཐོག་ནས་ཁོ་པ་སྤེན་པ་ཚེ་རིང་ནི་རྒྱ་ནག་གཞུང་གིས་བཏང་བའི་ཆེད་ལས་སོ་མྱུལ་བ་ཞིག་ཡིན་པ་ར་འཕྲོད་གསལ་པོ་བྱུང་ཡོད། སྤེན་པ་ཚེ་རིང་འདི་གར་འབྱོར་རྗེས་ཁོ་པ་བོད་ནང་ལས་བྱེད་བྱེད་མྱོང་ཡོད་པ་ཞིག་ཡིན་པའི་ཆ་ནས་འདི་ག་ལས་ཁུངས་ནས་དམིགས་བསལ་ལྟ་རྟོགས་བྱས་ཡོད། འོན་ཀྱང་ཁོ་པས་དགྲ་བོའི་སོ་མྱུལ་གྱི་ལས་འགན་བླངས་ཡོད་པ་འདི་ག་ལས་ཁུངས་སུ་ངོས་ལེན་མ་ཞུས་པར། ༸གོང་ས་མཆོག་གི་སྐུ་ཕྱྭ་མཛད་འཕྲིན་དང་འབྲེལ་བའི་གནས་ཚུལ་རྒྱ་ནག་གཞུང་ལ་མཁོ་སྤྲོད་བྱས་པ་དང་། བོད་མི་སྤྱིའི་རྩ་དོན་ལ་གནོད་གཞིའི་གནས་ཚུལ་མི་བདེན་རྫུན་བསྒྲིགས་ཀྱིས་མཁོ་སྤྲོད་བྱས་པ། དད་རྟེན་མཉམ་བཞེས་སྐུ་པར་བེད་སྤྱོད་ལོག་པ་བཏང་སྟེ་མི་གཞན་ལ་མགོ་སྐོར་བཏང་བ་དང་། རང་ཉིད་བོད་མིའི་སྒྲིག་འཛུགས་ཀྱི་བདེ་སྲུང་ལས་ཁུངས་ཀྱི་ལས་བྱེད་ཡིན་ཁུལ་བཤད་དེ་མི་གཞན་ལ་མགོ་སྐོར་བཏང་བ། རྒྱའི་ལས་འགན་བླངས་ཏེ་བོད་མིའི་སྤྱི་ཚོགས་ཁྲོད་མི་གསོད་ཁྲག་སྦྱོར་གྱི་དྲག་སྤྱོད་ལས་ཀ་བརྩམས་པ་བཅས་ཐ་ཤལ་གྱི་བྱ་སྤྱོད་སྤེལ་ཡོད།

ཚང་མས་མཁྱེན་གསལ་ལྟར། བར་ལམ་ཞིག་ནས་རྒྱ་ནག་གཞུང་གིས་བོད་མིའི་སྒྲིག་འཛུགས་གཏོར་བཤིག་གཏོང་ཆེད་ཐབས་ལམ་སྣེ་མང་བརྒྱུད་ནས་བོད་མིའི་སྤྱི་ཚོགས་ཁྲོད་སིམ་འཛུལ་གྱིས་བོད་མི་ནང་ཁུལ་དུ་འགལ་བ་བཟོ་ཐབས་དང་།ཐེར་འདོན་བྱེད་མཁན། ཀརྨ་ཡེ་ཤེས་སམ་བཀྲིས།

སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཕྱྭར་བསྡོ་བའི་ལས་འགུལ་བརྩམས་དང་རྩོམ་བཞིན་པའི་གནས་ཚུལ་རིམ་པ་ཡོད་བཞིན་པ་ལྟར། ད་ལམ་འཚེ་བ་དང་དྲག་ཤུགས་ལ་བརྟེན་ནས་བཙན་བྱོལ་སྤྱི་ཚོགས་གཏོར་བཤིག་གཏོང་རྒྱུའི་ངན་བྱུས་དངོས་སུ་ལག་བསྟར་བྱེད་མི་ངོ་མའི་ཐོག་ནས་ར་འཕྲོད་གསལ་པོ་བྱུང་ཡོད་ན། བོད་མི་སྤྱི་བོ་གནམ་བསྟན་ཡོངས་ཀྱིས་བཙན་བྱོལ་བོད་མིའི་སྒྲིག་འཛུགས་སྔར་ལྟར་སྲ་བརྟན་ཡོང་ཐབས་ལ་ཐུགས་སྣང་ངེས་པར་དགོས་པར་མ་ཟད། ལྷག་པར་ད་ལྟ་བོད་ནང་གི་གནས་སྟངས་ཉིན་མཚན་འཁྱོལ་དཀའ་བའི་ཇེ་ཞན་ཇེ་སྡུག་ཏུ་འགྲོ་བཞིན་པར་བོད་མི་རྒྱལ་ཞེན་ཅན་ཚོས་རང་ལུས་མེར་བསྲེགས་ཀྱིས་ངོ་རྒོལ་བྱ་དགོས་བྱུང་བ་སོགས་བོད་ཀྱི་གནས་སྟངས་ཛ་དྲག་ཅན་ཞིག་ཏུ་འགྱུར་བའི་དུས་འདིར། སྤེན་པ་ཚེ་རིང་ལྟ་བུ་དགྲ་བོའི་ལས་འགན་དང་དུ་བླངས་ཏེ་རང་དབང་ལུང་པའི་ནང་བོད་མི་སྤྱིའི་དཀའ་སྡུག་ལ་བསམ་ཤེས་མེད་པར་ཐ་ཤལ་གྱི་བྱ་སྤྱོད་སྤེལ་རྒྱུའི་འབད་བརྩོན་བྱས་པ་ནི་རང་གི་རིགས་ལ་ནག་ཉེས་བསགས་པའི་བྱ་སྤྱོད་དེ་ལས་ཐབས་སྡུག་པ་ཅི་ཞིག་ཡོད། དེས་ན་རང་རིགས་ཚང་མས་ད་རེས་ཀྱི་གནས་ཚུལ་འདི་ལས་བསླབ་བྱ་བླངས་ཏེ་བོད་མིའི་སྤྱི་ཚོགས་ནང་ཐ་ཤལ་གྱི་བྱ་སྤྱོད་འདི་རིགས་འགོག་ཐབས་སུ་གཞིས་བྱེས་གཉིས་ཀ་ནས་ཐུགས་སྣང་གིས་ད་དུང་རེ་ཟུང་རི་བོང་རྡོ་བརྫུས་ངང་ཚུལ་ཡོད་སྲིད་པས་དེ་དོན་མཐོང་ཐོས་དོགས་གསུམ་ནམ་བྱུང་ལ་འདི་ག་ལས་ཁུངས་ལ་ནང་དོན་སྙན་སེང་གིས་མཐུན་འགྱུར་རྒྱབ་སྐྱོང་ཡོང་བའི་འབོད་བསྐུལ་ནན་པོ་ཞུ་རྒྱུ་ཡིན།

བདེ་སྲུང་ལས་ཁུངས་ནས། ཕྱི་ལོ་ ༢༠༡༣ ཟླ་ ༥ ཚེས་ ༢༣ ལ།།

༡༽ རྒྱ་མིའི་སོ་མྱུལ་བ། སྤེན་པ་ཚེ་རིང།
༢༽ཐེར་འདོན་བྱེད་མཁན། བཀྲིས་རྒྱལ་མཚན་ནམ་བཀྲིས་དོན་གྲུབ། 
༣༽ཐེར་འདོན་བྱེད་མཁན། ཀརྨ་ཡེ་ཤེས་སམ་བཀྲིས། 

མཆན་བུ། (༠)

མཆན་འགྲེལ་ཐོག་མ་དེ་ཁྱེད་ནས་འགོད་རོགས་ཞུ།

7 དང་ 3 སྡོམས་རོགས།